انا و التاكسيست في اسبوع

الاثنين

صباح الخير

صباح المحبة و تونس المنورة بيكم يا شباب ، نتفكر صغري ككن تكيفكم الشعر طويل و الدبش لملون ، انتوما جماعة المسرح اسرحوا في هالبلاد خليها تنور بيكم ... قالو نهضة ... يعطيهم وهف ... احبوا اردونا كالسودان ... مايعرفوش الي احنا شعب احتلاتو فرانسا معنتها منور ومتعلم ومتثقف ونحترمو بعضنا ... كل واحد ابيع الي احب ... شراب ورد خبز

الثلاثاء

صباح الخير

خويا وين ماشي ... اه وسط لبلاد ... لا لا ... امبوتياج سامحني

الاربعاء

صباح الخير

بجاه ربي شنيا حكاية البنية الي اغتصبوها ... توا هاذي بلاد و يتعاش فيها ... انا باش نبيعها الكرهبة اول مايخلصو الكمبيالات ونهج... و برجولية حتى بناتنا كثرولها لعراء و الذراء ... فتنة و الله فتنة ... شوية احترام ماعندهمش عايلات ماعندهمش رجال ... و امبعد تقول اغتصبوني تي كل ليلة انطلعهم بالعينو و مافاهمين شيء وكالواحد اقلهم كلمة افوحو فيه ... تي كلو من البوعزيزي الله لا ترحملو عضم ... كنا الامن و الامان و لينا في المشاكل للكرومة

الخميس

صباح الخير

منين نجيب بيك ... موش من هنا خير اقرب و ارتحلي و ارتحلك ... و الا منين الراحة حمة الهمامي الكافر نهار كامل تحريض و تبلعيط وهو ينلك قصر في المنزه و قهوة بزوز مليارات ... تي نعرفها ديما نتعدى من قدامها ... البارح ريتو شيحكي في برنامج التونسية مع هالكلب معز بن غربية طحان الطرابلسية ... سامي الفهري ماهم ردموه في الحبس توا يخلط عليه هاك معز...

الجمعة

صباح الخير

.... صمت....

السبت

صباح الخير

برجولية هاك حبيب ميقالو بردلي على قلبي ... خلينا نعبرو ت يمانا ماربحنا شيء كان الحديث ... اخرتها ضحك و حديث ومولاها ربي...

الاحد

صباح الخير

بجاه ربي نسئلك توا عاجبك التئسيسي ... هام قالوا مازالوا باش ازيدوهم عام اخر ... ياخي يكتبو فاش في الدستور و الا في دستور تونس و ليبيا ومصر ... الفم الحارك و الزك البارك...