راس النهج

في راس النهج تاقف وحدك وجهك مظلم ، الضو ماينجمش امسك، و الي اشوفك صعيب احسك، زيد اوقف لغادي ، زيد وخر وزيد فيق امخر ، هوما الي اباتو اعسعسو و مصمصوا و يتلصلصوا وزيد افيق على بكري ، وانت توا جاي ظهرك معوج وعاي، قتلتك لمرمة و عينيك وجعتهم لكتب الحمراء و سنيك طيحتهم الخمراء ، وانت الي مخك فيه افكار الدنيا و فيه دنيتنا بلا غنيا ، 

راس النهج نتفكر كيف كانوا يتخباو فيه البوليس ، تتفكر من غادي ضربوك و شدوك وكركروك ومرمدوك ، رفسوك عفسوك غفصوك، تتفكر .... زيد تفكر وتذكر

راس النهج 

كبرت الروس في بلادنا و ممكن تتقص روس في بلادنا ، كلها تمجد وتهدد و تغرد وتزغرد و تسخن وتبرد ، فمة روس عملت قرون و رجعت بلا حشمة بلوسيها وعساستها وميليشتها وقالك احنا الي انجموا نهربو عليكم سيوف لخرين

اشكون لخرين؟؟

كمشة توانسة لبسوا لقصير وطولوا اللحية وقراو كلمتين للخوارج، اما ماقروش التاريخ ، مايعرفوش ابو ذر الغفاري و مايعرفوش ومايحبوش يعرفوا سلمان الفارسي و يكرهو الحلاج و مازالوا ياقفوا في راس النهج و يحلموا اهزوا السيوفة و يقصوا الروس .

راس النهج

راس السلطة الي عدى عمره في بودفة اخر كتاب قراه " جزء عمه" و يحلم يرجع للتحضيري يلعب مع الصغار و يعيش حياته اما كرسي السلطة معبيلو وقتو .... مسكين راسو تعبى و فكرو تخبى .

راس النهج